SIKU 167 ZA MATESO YA BANZA STONE

Duniani sisi sote ni wasafiri! Ndiyo msemo ninaoweza kuanza nao katika makala haya maalum kwa aliyekuwa mwanamuziki wa Dansi Bongo, Ramadhan Masanja ‘Banza Stone’ aliyefariki dunia Ijumaa iliyopita baada ya kuugua kwa muda mrefu.

Mwanamuziki wa Dansi Bongo, Ramadhan Masanja ‘Banza Stone’ enzi za uhai wake.

TUJIKUMBUSHE
Banza alizaliwa Oktoba 20, 1972 katika Hospitali ya Ocean Road jijini Dar na kupata elimu ya msingi katika Shule ya Mnazi Mmoja ambapo alihitimu mwaka 1987.

Banza alianza kufanya muziki wa Hip Hop mwaka 1989 ambapo yeye na wenzake walikuwa wakiimba katika redio mbalimbali na wakati mwingine walikuwa wakienda maeneo ya Coco Beach kuonesha vipaji vyao vya muziki, jambo ambalo liliwafanya waonekane wahuni.

Mwaka 1990 ndipo alipoamua kuingia rasmi kwenye muziki wa dansi.

Alifanikiwa kupata fedha katika kucheza dansi ambapo aliamua kwenda kujiendeleza na masomo ya muziki katika Kituo cha Utamaduni cha Korea jijini Dar kati ya mwaka 1990 hadi 1991.

BENDI ALIZOZITUMIKIA

Baada ya kuhitimu elimu ya cheti alianza kuimba katika bendi mbalimbali za muziki ikiwemo Twiga, The Heart String na Achigo Band.

Mbali na bendi hizo, Banza amewahi kupitia katika bendi kadhaa ambapo akiwa kwenye Bendi ya Twanga Chipolopolo alitunga Wimbo wa Hujafa Hujasifiwa ambao umebeba ujumbe unaosema ‘ningependa kujua baada ya kifo changu mimi Banza Stone watu watasema nini hapa duniani’. Baadaye alipitia TOT Band, Extra Bongo, Twanga Pepeta na nyinginezo.

Enzi za uhai wake aliwahi kusema kwamba hakuwa akidumu kwenye bendi moja kwani alizoea kuhamahama ambapo mwaka 1995 alitua rasmi kwenye Bendi ya The African Stars ‘Twanga Pepeta’ ndipo safari yake ya muziki ilipoanza kukua kwa kasi.Baada ya hapo, Banza anatajwa kama mmoja wa waasisi wa Mtindo wa Twanga Pepeta unaotumiwa mpaka leo.

ALIOTESHWA KIFO

Nakumbuka mwaka 2012, Banza alikiri na kuripotiwa katika magazeti ya Global akisema kwamba ameota kwamba amekufa hivyo anaona siku zake za kuishi ni chache na kwa wakati huo akaahidi kwamba anatunga nyimbo za wosia ambazo zitapigwa katika siku ya kifo chake.

Lakini kutokana na kusumbuliwa na ugonjwa na afya yake kudhoofu, Banza hakuweza kutimiza lengo hilo hadi alipofariki dunia.

SIKU 167

Banza alianza kuugua ‘serious’ Februari, mwaka huu ambapo alipitia mateso makubwa kwa takriban siku 167 hadi alipopatwa na umauti.

Katika kipindi hicho ndipo iligundulika kwamba alikuwa akisumbuliwa na fangasi za kichwani, akawa anatibiwa katika Hospitali ya Sinza-Palestina lakini wiki mbili kabla ya kifo chake alilazwa katika Hospitali ya Mwananyamala.

Mwanamuziki Banza alifariki dunia Ijumaa iliyopita nyumbani kwao, Sinza jijini Dar na kuzikwa katika Makaburi ya Sinza, Jumamosi ambapo ameacha mtoto mmoja anayejulikana kwa jina la Haji Ramadhan.

Banza amewahi kuzushiwa kifo zaidi ya mara 20 ambapo mwenyewe alikuwa akisema kwamba atakufa kwa ahadi ya Mungu na siyo kwa maneno ya binadamu ambao siku zote hawakosi la kuongea.