THAMANI YA PAMBA YASHUKA TENA.........

 

 

Meneja wa kiwanda cha Bilchand Oil Mill, Mohamed Gupta akifafanua uchafuzi unaofanywa na baadhi ya wanunuzi na wakulima kwa kuchang’anya pamba, maji, mchanga na mbegu kwa lengo la kuongeza uzito.

 

MAWAKALA wa ununuzi wa Pamba wilayani Kahama mkoani Shinyanga wamelalamikiwa kuhusika katika kuharibu ubora wa zao hilo kwa kuchanganya mchanga na mawe wakati wa ununuzi.

Akizungumza na waandishi wa habari ofsini kwake mwenyekiti wa umoja wa wanunuzi wa Pamba kanda ya ziwa (UMWAPA) Mhoja Nkwabi amesema hali hiyo imepelekea Pamba kushuka thamani katika soko la Pamba duniani.

Ukiitizama kwa harakaharaka pamba hii unaweza kuiona kuwa iko salama, ila ukichukuwa jukumu la kuigusa ndipo utagunduwa kuwa kunachembe chembe za mchanga na uchafu mwingine ndani yake.

Nkwabi amesema kuwa Mawakala wa ununuzi wamekuwa wakihujumu makampuni ya ununuzi wa Pamba kwa kuweka vitu vinavyoongeza uzito kwa manufaa yao hali ambayo ni kuyaibia makampuni hayo pamoja na wakulima huku serikali ikishindwa kutatua tatizo.

Ameongeza kuwa wakulima wamekuwa wakilalamika kuhusiana na kushuka kwa bei ya zao hilo na hii inatokana na makampuni yanayonunua Pamba kulazimika kufanya hivyo kutokana na Pamba kushuka ubora katika soko lake.

Katika hatua nyingine amesema Mei 3 mwaka huu umoja huo ulishakutana na serikali katika kutafuta suluhu ya tatizo hilo na kuiomba iwe inateua mawakala na itengeneze mfumo wa kuwabana pindi wanapobainika kufanya hivyo.

Hili ni lundo la mchanga wa kilo 60,000 uliopembuliwa wakati wa uchambuzi wa pamba ya msimu huu na uliopita, kwa Kiwanda cha Bilchand Oil Mill ambacho kimepata hasara ya zaidi ya shilingi milioni 7 kutokana na uchafuzi huo wa kuweka maji na mchanga, hadi sasa Wahasibu wake wanne (hakuwataja) wafikisha polisi kwa tuhuma hizo.  

Hata hivyo amewaomba wakulima na serikali kutoa ushirikiano katika makampuni yanayonunua Pamba nchini kuwabaini wanaotumia mfumo wa kuongeza vitu vizito kwenye Pamba safi ili wapate kilo nyingi.

Kumekuwa na matatizo ya wakulima kulalamikia makampuni ya ununuzi na serikali kwa ujumla kushusha bei ya zao hilo kila msimu wa ununuzi unapofika bila hatua zozote za ufumbuzi kufanyika.