RIWAYA YA KIJASUSI | KIKOSI CHA KISASI SEHEM YA 8

Tulipoishia >>>>>>"Jiangalieni sana maana inavyoonekana watu hawa wana mbinu nyingi sana. Huyu Kabeya ana uhusiano na Mahoteli karibu yote makubwa kama nilivyokwisha kuwaeleza, hivyo msipuuze kitu chochote dakika yoyote," Willy aliwashauri.
"Tuonane tena hapa wote mchana kiasi cha saa saba ili tuelezane maendeleo ya asubuhi hii, maana kama Robert kama Robert ataweza kupata hizo habari nafikiri litakuwa jambo la maana sana. Sasa mimi naondoka lakini tutaonane wakati huo," Willy alisema huku akisimama. Aliangalia saa yake ilikuwa tayari saa tatu.
"Oke, saa saba tutaonana." Walijibu wenzake, yeye Willy akaondoka.

Shuka Nayo Sasa............

Wakati Willy anaondoka nyumbani kwa Robert saa tatu hivi mkutani mkali ulikuwa ukiendelea nyumbani wa Pierre huko Limete. Mkutano huu ulikuwa umeanza saa moja ya asubuhi lakini ulikuwa bado unaendelea. Mazungumzo hasa katika mkutano huu yalikuwa yanahusika na tukio lililokuwa limetokea usiku ule huko 'Garage Papadimitriou'.Pierre ambaye alikuwa ametoa maneno makali sana kwa kushindwa kwao katika tukio hili, alikuwa saa hizi amesimama na huku anatembea toka pembe mpaka pembe ya chumba kitu ambacho kilionyesha kuwa alikuwa na mafikira mengi sana.
"Hili tukio ndilo liwe la mwisho kwetu kushindwa. Ni aibu kubwa kuona ya kwamba kundi tulilolijenga muda mrefu liweze kuingiliwa na kutingishwa na watu wawili. Hapana watu hawa lazima watafutwe na wauawe mara moja, maana sijui BOSS italipokea vipi tukio hili wakati mjini hapa imeweza kuweka watu wake mashuhuri na wenye vyeo vya juu kabisa wapatao watano, na eti ipate habari kuwa wapelelezi wawili na wakiwa na wakiwa Waafrika wameweza kuingia ofisi mojawapo ya 'WP' na kuua watu wake chungu nzima. Hapana jamani lazima jambo hili sasa limegeuka linahitaji tulishughulikie sisi wenyewe, huenda hawa vijana wetu hawana ujuzi wa kutosha," alieleza Pierre kwa uchungu.
"Sawa Patroni jambo lililotokea jana limekuwa ni fundisho kubwa sana. Kosa ni langu kwa sababu niliwadharau watu hawa, nilifikiri wasingeweza kuwa na ujuzi kiasi cha kuweza kutuingilia namna ile. Lilikuwa kosa kubwa mno watu hawa ni hatari sana na wana ujuzi kama sisi au zaidi," alikiri Papa.
Muteba na Jean waliokuwa wamesikiliza maelezo ya Papa kwa makini sana, waliendelea kunyamaza kwani mambo mengi yalikuwa yakipita mawazoni mwao. Walijua ya kwamba wakati umefika sasa ambao wao wenyewe ndio watatumika na wala hawatamtuma mtu. Walitambua kuwa muda wa mapumziko umekwisha kwani kwa muda mrefu sana wamekaa kibwana mkubwa na kuishi kifahari lakini sasa wakati wa kulipa umefika.
"Mbona mmeduwaa namna hii?" Pierre aliwashtua.
"Mimi niko tayari kabisa kupambana na watu hawa na wala wasikupe taabu," aliropoka Muteba.
"Na mimi vile vile niko tayari ni siku nyingi sijapata muda wa kashikashi kama huu naamini naamini nitaufurahia sana. Nitawaonyesha watu hawa kuwa sisi sio vipimo vyao," alijitapa Jean.
"Kama tulivyopata bahari, watu hawa hawakurejea tena mahotelini kwao jana usiku. Lakini nina imani mchana huu watu hawa lazima watarudi kubadilisha nguo zao. Hivi itabidi tuwe na watu wa kuangalia mahoteli haya, na wawe na ujuzi wa kuweza kumfuata mtu bila ya yeye kutambua. Ni dhahiri kuwa watu hawa wanatembea kwa tahadhari kubwa, na wanalindana kutokana na tulivyojifunza na tukio la jana, hivi itabidi kati yetu tuongoze watu watakaofanya kazi hii na kama mtu akipata nafasi nzuri anaweza kufanya mashambulizi." Pierre alieleza. Muteba na Jean walijitolea kuwa wangeongoza watu hawa.
"Nashukuru," alijibu Pierre. "Lakini kumbukeni watu hawa ni hatari, mkipata nafasi nzuri msiwape nafasi waueni pale pale mimi sijali tena litakalotokea. Hasara waliyokwisha tupa ni kubwa mno kiasi kwamba sijali tena. Mimi nitakuwa gerejini kwangu, ripoti zote mtaniletea huko. Na kama mimi nitawahitaji nitawaeleza.
Wote walisimama wakaondoka kimya kwenda kwenye uwanja wa mapambano. Walipokuwa wameishaondoka Pierre alienda kupiga simu. "Hallo Sozidime hapa," sauti ya msichana alijibu.
"Hapa ni Garege du Peuple, Mkurugenzi yupo?" Aliuliza Pierre.
"Ndiyo yupo".
"Nipe nizungumze naye," Pierre aliomba

Ofisi za 'Agence Sozidime' zilikuwa ziko sehemu ya Gombe mtaa wa Avioteuurs karibu na jumba la sinema liitwalo Cine Rac. Habari zote hizi zilikuwa kwenye kadi ambayo Tete alikuwa amempa Willy, hivyo haikuwa vigumu kwa Willy kuipata ofisi hii. Wailly aliipata ofisi hii karibu na 'Cine Rac' kama ilivyokuwa imeelezwa kwenye kadi. Ofisi yenyewe ilikuwa ndani ya nyumba moja ndogo ambayo ungefikiri ni nyumba ya mtu binafsi ya kuishi. Ilikuwa imezungukwa na michongoma mirefu ambayo ilikuwa inaimeza nyumba, na mbele kulikuwa na lango kubwa. Mbele ya lango ndipo kulikuwa na ubao mkubwa uliokuwa umeandikwa kwa maandishi makubwa sana, 'AGENCE SOZIDIME'. Willy aliingia kwenye lango hili na kusimama. Mlinzi aliyekuwa pale mlangoni alimwonyesha ishara ya kupita moja kwa moja. Ndani alikuta nafasi kubwa ya maegesho akaegesha gari lake. Kulikuwa na magari mengine yapatayo karibu ishirini ambayo yalimfanya Willy kutambua kuwa kampuni hii ilikuwa na maofisa wengi. Vile vile alipoangalia mazingira ya nyumba na ofisi hii alihisi kuwa zamani lazima ilikuwa nyumba ya mtu binafsi. Alisukuma mlango wa mbele wa nyumba hii ambao ulikuwa umeandikwa kwa karatasi iliyoandikwa SUKUMA.
Kuingia alijikuta yuko kwenye sebule kubwa iliyotandikwa zulia moja safi sana toka ukuta hadi ukuta. Chumba hiki kilizungukwa na makochi mazuri sana yakiandamana na meza ndogo ndogo. Hewa ya humu ndani ilikuwa baridi sana kitu kilichoonyesha kwamba mashine ya kuleta baridi 'air condition ilikuwa inatumika. Nyumba nzima ilikuwa kimya isipokuwa mashine ya kupiga chapa iliyokuwa ikisikika tokea vyumba vya ndani. Willy alijikuta anaangaliana moja kwa moja na Tete ambaye uzuri wake uliongezea uzuri wa chumba kizima. "Karibu Willy," Tete alimkaribisha Willy wakati alipomuona. Mwili mzima wa Willy ulisisimkwa kwa kusikia sauti nyororo ya msichana huyu, pamoja na macho ya msichana huyu yaliyokuwa yakimtazama kama kwamba yanamwambia 'usijaribu kunisahau'. Willy alisogea akataka kujibu, lakini sauti ikakwama, akatoa kohozi, na kwa sauti ya kubabaika alijibu, "Asante". Kusema kweli msichana huyu alikuwa mzuri nadiriki kurudia kukueleza tena, mimi nina imani kama wewe ndiye ungekuwa mahali pa Willy ungepatwa na kizunguzungu na ungeweza kuanguka chini, maana nasikia kuna watu wamewahi kupatwa na mkasa huo. Lakini kwa vile ni Willy alikaza roho na kumsogelea msichana huyu. "Habari za toka jana," Tete alimsalimu.
"Nzuri ulifika salama?"
"Nilifika ingawaje gari langu lilinifanyia uhuni kidogo." Alijibu Tete huku akiendelea kumwangalia Willy kwa macho malegevu. Moyo wa Willy ulipiga haraka haraka akajibu, "Pole sana."
Tete naye moyo wake ulikuwa unapiga haraka haraka, maana naye kwa sababu asizozijua alijukuta anaguswa vibaya sana moyoni kwake na kijana huyu ambaye asubuhi hii alikuwa akipendeza zaidi kuliko alivyokuwa amemuona usiku uliopita.
"Karibu kaa kwenye kiti, nimeisha kufanyia miadi na Meneja wa Biashara ambaye yuko tayari kuonana na wewe. Nilifanya miadi na Mkurugenzi lakini ana shughuli nyingi sana wiki hii hatakuwa na nafasi. Subiri nimuulize Meneja wa Biashara kama yuko tayari sasa hivi," alieleza Tete. Willy alikaa kwenye kochi. Kwenye meza iliyokuwa mbele yake kulikuwa na magazeti mengi. Aliyaangalia akaona gazeti la 'Salongo' la siku ile akaanza kuliangalia huku akingojea Tete arudi. Alichunguza gazeti hili na kwenye pembe moja ndani ya gazeti alikuta kitu ambacho alikuwa akikihitaji kukiangalia. Kulikuwa kumeandikwa kwa kifupi sana habari za ajali waliyoifanya na wale watu waliokuwa wanamfuata Ozu. Gazeti lilisema tu kwamba mtu mmoja alikutwa barabara ya Poids Lourds amepigwa risasi na gari aliyokuwa akiendesha ikiwa imepata ajali. Liliendelea kusema polisi walikuwa bado wanaendelea na uchunguzi wa tukio hili.
"Yuko tayari kukuona," Tete alimweleza.
"Asante," Willy aliweka gazeti chini akaanza kumfuata Tete ambaye alifungua mlango wakaingia ndani, wakamkuta msichana wa kizungu ndiye alikuwa mwandishi mahsusi wa Meneja wa Biashara.
"Oh asante sana, karibu Willy," msichana huyo wa kizungu ambaye naye alikuwa mzuri sana alimkaribisha Willy.
"Asante," alijibu Willy huku wakisalimiana.
"Wille. Lucie atakushughulikia, tutaonana ukitoka," Tete alimwambia na kumminyia jicho, kitu kilichomshinda Willy na kubabaika hata hakuweza kujibu. Baada ya Tete kuondoka Lucie alimsindikiza Willy ofisini kwa meneja wake.
"Bwana Max tafadhali onana na bwana Willy," Lucie aliwafahamisha.
"Oh bwana Willy karibu, nimepata habari zako toka asubuhi," alijibu Max
"Asante sana, nami nimefurahi kufika ili tuweze kuzungumza," walielezana huku wakishikana mikono. Lucie alitoka akawaacha waendelee na mazungumzo yao. Willy alivuta kiti akaa huku akimwangalia meneja huyu wa kizungu tayari kuanza mazungumzo naye.
"Nimepata habari kuwa unawakilisha kampuni moja ya wakala ya nchini Zambia," Max alisema.
"Ndiyo mimi ni mwakilishi wa kampuni iitwayo 'Zambia Overseas Agency' na natumaini umewahi kuisikia," Willy alifungua mkoba wake, akatoa kadi yake ya kibiashara kati ya kadi alizokuwa ametayarishiwa na Chifu kabla ya kuondoka mjini Lusaka. Max aliiangalia kisha naye akatoa akampa Willy.
"Ni jambo zuri kwa kufika kwako hapa kutuona kwa mazungumzo ya kibiashara, Kusema kweli kampuni yetu ni kubwa na ina uhusiano wa kibiashara na nchi nyingi sana. Ilikuwa bahati mbaya tu kuwa bado tulikuwa hatuna uhusiano wa kibishara na makampuni ya Zambia. Hivi tunakukaribisha sana," mazungumzo haya alizungumza max.
"Asante sana, kusema kweli bwana Max kampuni yetu ndiyo wakala wa makampuni mengi nchini Zambia. Kwa sasa hivi Shirika la Mazao la Zambia ambalo ni kati ya makampuni tunayowakilisha linahitaji kuuza mahindi nchi za nje, hivi limetupa jukumu la kutafuta wanunuzi. kutojkana na habari za kibiashara Zaire inahitaji sana mahindi, Kwa hivi nimefika hapa kuwaona baada ya kupata habari kuwa kampuni yenu ndiyo inawakilisha makampuni mengi ya humu nchini na makampuni ya njeyanataka kufanya biashara nchini huku. Natumaini mtanitatulia shida yangu," alisema Willy.
"Ahaa, nimekuelewa kwa ufasaha sana. Kusema kweli Zaire inahitaji sana mahindi, na kwa sasa hivi inaagiza mahindi kutoka Rhodesia. Tukiangalia na upande mwingine Zaire ikiwa ni nchi ya Kiafrika na mwanachama wa OAU na Umoja wa Mataifa si vizuri kisiasa kufanya biashara na serikali ya walowezi ya Rhodesia. Lakini kutokana na hali halisi ya kiuchumi ilivyo Zaire imebidi kufanya biashara na Rhodesia. Litakuwa jambo la maana sana bwana Willy kama Zambia itakuwa tayari itakuwa tayari kuisaidia Zaire kibiashara ili iweze kupunguza biashara na Rhodesia na hatmaye kuikomboa kabisa Zaire kutoka mikononi mwa walowezi kiuchumi," Max alimweleza. Willy aliyekuwa anasilikiliza maelezo ya mzungu huyu ambaye alikuwa ameanzisha mazungumzo yanayoingiliana na siasa kali iliyokuwa inamgusa moyo, alimtilia mashaka sana mtu huyu kama kweli alikuwa anazungumza kutoka moyoni mwake au alitaka kumsikia yeye Willy amesimama wapi. Hivi alijibu.
"Jambo hili niachie nitalishughulikia, kwani umefikia wapi?" Max aliuliza.
"Niko Hoteli Memling,"
"Utakuwa hapa mjini kwa muda gani?"
"Leo ni Jumatano... nitakuwa hapa mpaka wiki ijayo", alijibu Willy.
"Vizuri bwana Willy, mimi nitakupasha habari kati ya kesho au kesho kutwa, maendeleo nitakayokuwa nimeyafanya juu ya suala hili. Nitazungumza na Wizara ya Kilimo na Mashirika yanayohusika. Usiwe na shaka jambo hili limefika mahali penyewe," Max alieleza huku akisimama, akaenda ukutani akawasha mashine ya kuleta baridi. Kitendo hiki kilimgutua kidogo Willy lakini akaona kweli hali ya joto ilikuwa imeanza kuingia.
"Lini umefika hapa mjini?" Max alimuuliza.
"Toka Jumatatu," alijibu Willy kisha aliendelea na mazungumzo ya kibishara kwa muda kidogo halafu Willy akaamka tayari kwa kuondoka. "Nashukru sana bwana Max nafikiri sasa nitaondoka. Mimi nitakuwa nasubiri kusikia toka kwako," Willy aliaga.
"Karibu tena siku nyingine", Max alijibu naye akasimama kumsindikiza Willy. Max alimsindikiza na kuingia kwenye ofisi ya Lucie.
"Asante sana Lucie, mimi ninaondoka," Willy aliaga.
"Asante karibu tena," Lucie alijibu. Max alimsindikiza Willy mpaka mapokezi ndipo akamuaga.
"Oh Willy nitakupigia simu."
"Asante nitaisubiri," walipeana mikono Max akarudi ofisini kwake huku Willy akibaki anazungumza na Tete.
"Vipi mazungumzo yenu yameambua chochote cha maana?" Tete aliuliza.
"Oh yamekuwa mazuri kiasi ambacho sikutegemea" alijibu Willy.
"Nashukuru imetokea hivyo. Je leo mtakuwa wapi?" Tete aliuliza.
"Sijajua bado mpaka nimwulize Mwadi ambaye ndiye mwenyeji wangu. Je ulikuwa unasemaje?" Willy aliuliza.
"Basi nitampigia simu Mwadi", Tete alijibu kwa mkato.
"Haya vizuri, nitajua toka kwake," alijibu Willy. Kisha waliagana na kuahidiana kuwa huenda wangeonana jinsi ile baada ya kila mmoja wao kuzungumza na Mwadi. Willy aliingia ndani ya gari lake huku akiwa na mafikira mengi sana juu ya ofisi hii. Baada ya kufikiria mambo kadhaa yaliyomtia wasiwasi juu ya ofisi hii kuwa itambidi arudi na kuingia ndani ya ofisi hii wakati itakapokuwa imefungwa, hasa wakati wa usiku kwa siri ili aweze kutuliza wasiwasi wake. Alipoangalia saa yake aliona ni saa tano, akaamua kufika madukani kidogo.

Ilikuwa saa sita kamili Willy alipofika hotelini kwake na alimkuta Mwadi yuko kazini. "Habari za saa hizi?" Willy alimgutusha Mwadi aliyekuwa ameinama huku anaandika.
"Oh Willy mpenzi, habari zangu ni nzuri tu. Vipi shughuli zako?"
"Shughuli zangu zimeenda vizuri sana, nafikiri mambo yangu yatafanikiwa haraka zaidi kuliko nilivyotegemea", alijibu Willy. "Ehe nipe mipango, ningetaka kuonana na Tete jioni ili aweze kunielewesha vitu fulani fulani, kwa hivyo nitakupitia jioni tukamwone halafu ndipo tutaendelea na mambo mengine baada ya hapo."
"Tete amenipigia simu, akiuliza tuna mipango gani jioni. Mimi nimemjibu kuwa mpaka tuonane ndipo nitamjibu. Sasa mimi nitamwambia kuwa tutaenda kwake jioni atusubiri. Sawa?" Mwadi aliuliza.
"Sawa kabisa, kwani yeye anakaa wapi?" Willy aliuliza.
"Anaishi huko Ndolo, unakujua ndolo?"
"Ndiyo".
"Basi ana nyumba moja nzuri sana huko, barabara ya Kibinda nyumba nambari 16, nyumba yake inatazamana na kiwanja cha ndege cha Ndolo", alisema Mwadi kwa utulivu.
"Nyumba hiyo amepanga ama ni mali yake?", Willy aliuliza.
"Ni mali yake. Watu wengi wanasema nyumba hii alinunuliwa na rafiki yake Muteba. Kama ulivyomwona msichana mwenyewe hata wewe kama angekwambia umnunulie nyumba naamini ungefanya hivyo", Mwadi alimtania.
"Wacha mambo yako", Willy alijibu huku anaangalia saa yake.
"Twende tukapate chakula cha mchana".
"Nenda tu mimi niko kazini mpaka baadaye." Mwadi alijibu.
"Nisubiri nyumbani nitakupitia kiasi cha saa kumi na mbili au saa moja jioni".
"Usiwe na shaka mimi nitakuwepo nikikusubiri kwa hamu sana," Mwadi alijibu.
"Willy alielekea kwenye chumba cha chakula, huku nyuma Mwadi akiwa anamwangalia hadi alipopotea. "Nitahakikisha kijana huyu anaondoka na mimi," alijisemea Mwadi. Baada ya chakula Willy aliondoka na kuelekea nyumbani kwa Robert, ili kuwahi miadi yao waliyokuwa wameipanga hapo awali.
"Nilipoingia chumbani kwangu nilikuta chumba kimepekuliwa vibaya sana lakini kwa ujuzi wa hali ya juu kiasi kwamba mtu wa kawaida hawezi kujua kimepekuliwa. Hii inazidi kuthibitisha kuwa watu hawa si wa kawaida ila nao ni watu wenye ujuzi," alieleza Willy alipofika.
"Mimi nilikuwa ninayo mawazo kuwa, jioni ingebidi tukaangalie hii gereji iitwayo G.A.D. ili tuhakikishe kama kuna huhusiano kati yake ya Garage Papadimitriou?" Kofi alishauri.
"Hili lipo nilikuwa bado nakuja kulizungumzia. Mpango wa leo utakuwa kama ifuatavyo. Sasa hivi itabidi tupumzike mpaka jioni kwani usiku wa leo ndipo kazi itafanyika. Saa kumi na mbili jioni mimi nitaondoka kwenda kumwona Tete, maana nina miadi na Mwadi ili aweze kunipeleka huko.
"Shughuli zangu itabidi nizifanye katika muda wa masaa matatu ili kiasi cha saa tatu usiku niwe nimerudi hapa tayari kwa shughuli za usiku. Kama Kofi alivyosema itabidi tuitembelee Garage 'G.A.D'. Kwa hivyo sasa hivi tutapumzika kusudi tujiweke katika hali nzuri ya kuweza kukabili mambo yoyote yatakayotokea usiku". Willy aliwaeleza.
"Jambo la maana kabisa sababu usiku wa jana hatukupumzika vizuri," alijibu Ozu. Wote walikubaliana na maelezo ya Willy na kuondoka kuelekea kwenye vyumba vya kupumzika ndani ya hii nyumba ya Robert ambayo ilikuwa nyumba kubwa sana.
Wakati Willy na wenzake wakiendelea na mazungumzo. Pierre na wenzake nao walikuwa wamekusanyika ofisini kwake wakiwa na mazungumzo vile vile.
"Wale watu ni watu wenye ujuzi wa hali ya juu sana. Jinsi walivyotukwepa na kutufanya tusiwaone ni kwa namna ya ujuzi wa pekee Patron, mimi nimeridhika kabisa kuwa watu hawa kama alivyosema Papa wana ujuzi sawa sawa na sisi huenda hata na kuzidi. Hivi itabidi sasa tutumie mbinu zetu zote tukitaka kuwafutilia mbali," alikiri Muteba. Jean naye alieleza maelezo kama haya haya naye vile vile akakiri kuwa watu waliokuwa wanapambana nao hawakuwa mchezo.
Pierre aliwasikiliza kwa utulivu sana kisha akasema; "Kwa taarifa yenu kuna mtu mwingine ambaye anaweza kuwa mmoja wa watu hawa kwa vile sababu zilizomleta ni sawa sawa na za hawa watu wawili. Yeye naye alifika mjini hapa juzi Jumatatu akitokea Lusaka akiwa katika mapumziko ya kikazi. Mtu huyu anasema yeye ni mwakilishi wa kampuni moja ya wakala ya Zambia iitwayo 'Zambia Oversea Agency'. Mtu huyu leo alikwenda kwenye ofisi za Sozidime akaonana na Max wakazungumza mambo ya kibiashara. Mtu huyu anasemekana alionana jana usiku na Tete huko Parafifi Bar, na kupeana miadi ya kufika ofisini kwao kwa mazungumzo ya kibiashara na wakuu wake, kitu ambacho ametimiza.
Muteba ambaye moyo wake ulikuwa ukipiga haraka haraka kwa kusikia jina la Tete linatajwa katika habari hii aliinua macho yake ambayo yalionana sawa sawa na Pierre, ikabidi Pierre amuulize, "Unasemaje Muteba?"
"Hizi habari umezipataje?" Muteba aliuliza.
"Kama unavyojua wakala wanafanya kazi zao kwa makini sana. Wao toka nimewapasha habari juu ya matukio ya jana mchana na usiku wako macho. Waliposkia kuwa kuna mtu wa namna hii anakuja kuwaona walitia mashaka. Na mashaka yao yalizidishwa baada ya kumwona mtu huyu, mtu huyu wanahisi lazima awe mpelelezi tu kutokana na alivyo. Hivyo walinasa mazungumzo yake kwenye utepe uliokuwa umefichwa ofisini mwa Max. Mazungumzo yote nimeyasikia kwani wamenieleza. Kwa kujibu suala lako Muteba hivi ndivyo nilipata habari hizi. Mtu huyu anajiita Willy Chitalu. Mkurugenzi amepeleka habari hizi BOSS waweze kuchunguza na kutujibu kama wanaweza kuwa na habari za mtu huyu akiwa kama ni mpelelezi. Wakati huo huo huenda itakuwa rahisi kwako Muteba kuweza kupata habari kamili za mtu huyu kutoka kwa rafiki yako Tete ambaye ndiye amemfahamisha mtu huyu huko Sozidime."
Muteba alijawa na wasiwasi kwani kujiingiza kwa Tete katika suala hili ingeweza kuwa hatari kwake, kwa kutaka kumtetea alijibu, "Mimi nina imani Tete alifanya hivi kikazi bila kujua jambo lolote kwani yeye hajui shughuli za kisiri za Sozidime. Kwa hivi alimjulisha mtu huyu kikazi kabisa. Lakini hata hivyo nitazungumza niweze kujua alimfahamufahamuje mtu huyu kiasi cha kuwekeana miadi,"
"Hata mimi naamini kuwa Tete hakumjulisha kwa nia mbaya, bali chunguza tu na ikibidi jaribu kumshawishi akujulishe kwa mtu huyu. Kazi hii jaribu kuishughulikia leo hii maana kama kweli na huyu vile vile ni mmoja wao inabidi tuwe na uhakika tuweze kujua nguvu za upinzani wetu," kisha alimgeukia Jean akamwambia, "Mtu huyu amefika toka Jumatatu, na amefikia Hoteli Memling, na mimi nilikueleza wageni wote toka juzi waorodheshwe hasa kama huyu ambaye anatoka Lusaka sijui kama yuko kwenye orodha yako?"
"Jina hilo bado halijanifikia, nashangaa kwa nini. hebu nipe simu." Jean alipiga simu ofisini kwake akazungumza na Kabeya. Wengine waliendelea na mazungumzo. Alipomaliza aliwaeleza. "Ni jambo la ajabu sana. Kabeya anasema amepata majina ya watu wote waliofika hoteli Memling kwa msichana mmoja aitwaye Mwadi ndiye anampa maelezo yote kwa muda mrefu sasa ila anashangaa kwa nini jina la mtu huyu lilisahauliwa. Amesema atachunguza kwa nini."
"Mwadi ninamfahamu sana ni rafiki yake Tete, hivyo mueleze Kabeya asifanye lolote anisubiri tutalishughulikia jambo hili pamoja," Muteba alishauri.
"Jambo zuri sana, kama utalishughulikia jambo hili, maana nahisi kuna kitu kati ya wasichana hawa na mtu huyu. Ufanye kila mbinu uweze kuonana naye", Pierre alimweleza Muteba.
Mambo ya huyu Chitalu tuyaache mikononi mwa Muteba na Kabeya wayashughulikie," Papa alikubaliana.
"Tatizo lililobaki ni kwamba hawa watu wawili Ozu na Kofi bado wanatusumbua, usiku wa leo lazima tuwe na ulinzi mkubwa huko 'Garage Papadimtriou' maana wanaweza kwenda huko na leo tena. Vile vile magereji mengine yawe katika ulinzi wa kutosha maana huwezi kujua watu hawa wanajia kiasi gani. Fikiria, kama huyu Willy ni mmoja wao vipi ameweza kuitilia mashaka Sozidime? Hivyo lazima tuwe tayari kila dakika kuwakabili watu hawa wakijitokeza. Halafu msako wa watu hawa lazima uongezwe, na mahali popote watakapoonekana tu wauawe pale pale msisubiri maana kama mnavyosema wenyewe watu hawa ni hatari. Msiogope polisi, nyinyi shughulikeni, mambo ya polisi mniachie mimi," Pierre aliwaeleza.
"Jambo la maana kabisa Patron, tokea sasa hivi ninaongoza msako huu, kwani hawa watu nina deni nao, lazima tuonane tena uso kwa uso ili ijulikane waziwazi, nani ni nani kati yetu," alijigamba Papa. Baada ya mkutano huu, watu hawa waliondoka kwenda kushughulikia kazi kila mmoja aliyoipewa.

Ilikuwa saa kumi na mbili za jioni wakati Willy alipoondoka nyumbani kwa Robert, ili kuelekea Bandalungwa nyumbani kwa Mwadi. Wenzake aliwaacha bado wanapumzika. Kiasi cha saa kumi na mbili na robo ndipo Willy alikuwa anaegesha gari lake nje ya nyumba ya Mwadi. Alifungua mlango wa gari akaenda kubisha hodi mlangoni, lakini hakupata jibu lolote. Alishangaa sana kwa kutomkuta Mwadi nyumbani na hali alikuwa amemuahidi kuwa atakuwa anamsubiri.
Kisha aliamua kumsuburi kidogo, kwani aliona kulikuwa na umuhimu wa kumsubiri ili waende wote kwa Tete. Maana aliamini kuwa angeweza kupata maelezo mengi zaidi kutoka kwa Tete kwa kumtumia Mwadi. Alimsubiri hapo nje kiasi cha robo saa zaidi mpaka akaanza kuingiwa na wasiwasi. Alienda akaujaribu mlango kama umefungwa, akakuta uko wazi kitu ambacho kilimwonyesha kuwa Mwadi hakuwa ameenda mbali. Alipoingia ndani tu, mara kengele ya tahadhari ikalia kichwani mwake maana aliona matone ya damu chini kwenye zuria. Alirudisha mlango haraka na kutoa bastola, huku akichunguza huko na huko. Alifungua mlango wa chumba cha kulala kwa ghafla na kuingia ndani. Loo tishio alilolikuta ndani mle ni lile ambalo hatawahi kulisahau.
"Mama yangu mzazi" Willy alilalamika kwa hasira. Mwadi alikuwa amekatwa na huku amelazwa kitandani na ametumbuliwa matumbo nje. Yalikuwa mauaji ya kishenzi ambayo Willy alikuwa hajawahi kuyaona. Haraka haraka Willy alichukua shuka akaifunika maiti ile, akaangalia huku na huku lakini hakukuwa na kitu chochote cha maana kwa uchunguzi akamuapia Mwadi kwa sauti, "Mungu mmoja, mpenzi wangu Mwadi, watu waliokufanya hivi, nitakulipizia kisasi kwa mkono wangu. Maana umekufa kwa ajili yangu. Nitakukumbuka daima," Alipokwisha kusema maneno haya alitoka haraka haraka na kufunga mlango wa chumba na wa mbele akiwa amejawa na hasira na uchungu mwingi aliamua kwenda Ndolo. Mawazo yake yalikuwa yamemtuma kuwa, mauaji ya Mwadi lazima yalikuwa yameletelezwa na uhusiano wa yeye, na vile vile alihisi kuwa lazima angekuwa anajua habari fulani fulani juu ya mauaji haya, maana Tete na Mwadi walikuwa wamepigiana simu mchana na ndiye mtu aliyejua Willy atakuja kwa Mwadi na vile vile kuwa Mwadi atakuwa nyumbani. Akiendesha kama mwendawazimu alielekea Ndolo nyumbani kwa Tete. Alipofika Ndolo alikumbuka kuwa Mwadi alikuwa amemwambia kuwa Tete alikuwa na nyumba yake iliyokuwa inatazamana na uwanja wa mdogo wa ndege wa Ndolo. Alienda mpaka sehemu hii akaikuta nyumba nambari 16 ambayo ilikuwa imezungukwa na seng'enge pamoja na michongoma. Kulikuwa na lango kubwa, lakini wakati huu lango hili lilikuwa wazi. Willy aliingiza gari lake moja kwa moja ndani ya ua. Alikuta kuna gari moja ndogo aina ya 'MG Sports' akahisi kuwa hii ilikuwa gari ya Tete kwa sababu alikuwa ameiona pale Sozidime. Huku akiwa katika tahadhari kubwa alitelemka ndani ya gari na wati huo huo Tete naye alikuwa amefungua mlango wa mbele ya nyumba.
"Ooh karibu Willy, mbona uko peke yako, Mwadi yuko wapi?", Tete alimkaribisha Willy na kumuuliza.
Willy alijibu, "Asante." Jibu hili lilimtatanisha Tete lakini hakusema kitu. "Nani mwingine yuko hapa nyumbani kwako," Willy aliuliza huku amepandwa hasira wakati wameingia ndani ya kurudisha mlango.
"Hamna mtu mwingine," Tete alijibu kwa woga maana aliona sura ya Willy imebadilika kiasi kwamba alionekana kama mzee. Willy alimshika Tete, akaanza kumtwanga makofi, "Niambie nani amemuua Mwadi la sivyo nitakuua na wewe," Willy alimwambia kwa harira. Tete ambaye alikuwa ameanza kupiga makelele kwa kupigwa makofi alinyamaza ghafla baada ya kusikia maswali haya ya Willy.
"Niache , unasema nini?" Tete aliuliza huku macho yote yamemtoka na uso wake ukapoteza rangi naye vile vile akaonekana kama mzee. Kuona hivi Willy alimuachia akamjibu.
"Mwadi ameuawa kishenzi kabisa naamini wewe unajua nani amemuua kwa sababu ni wewe na mimi tuliojua mienendo ya leo ya Mwadi.
Kusikia hivi Tete alianza kulia kwa uchungu mwingi. "Sikiliza Tete, mimi sikuja hapa kukuangalia unalia, ninachotaka kujua nani amemuua Mwadi, au niulize hivi mtu gani amekuuliza habari za Mwadi leo?" Willy alimuuliza. Tete aliinua macho yake akamwangalia Willy kisha akasema kwa sauti ya uchungu.
"Mwadi alikuwa rafiki yangu sana, tumefahamiana muda mrefu toka tuko shule. Siamini kama amekufa".
"Kama kweli alikuwa rafiki yako mimi nataka kulipizia kisasi. Sasa lazima unisaidie, kuna mtu amekuuliza habari za Mwadi leo?" Willy aliuliza baada ya kuona Tete analalamika. Tete alianza kufikiria jinsi mpenzi wake Muteba na rafiki yake Kabeya walivyokuja saa kumi ile baada ya kutoka kazini na kumuulizia juu ya Willy na Mwadi na sasa alishangaa kusikia Mwadi ameuawa. Hakuamini kuwa Muteba angeweza kufanya jambo hili. Kufikiria hivi kulimfanya machozi mengi yazidi kutiririka kwani alijukuta katika hali ya kutatanisha sana. Alianza vile vile kumfikiria huyu kijana aliyesimama mbele yake alikuwa na nini kiasi awe kwamba uhusiano wake na Mwadi umefanya akina Kabeya wamuue Mwadi, hata yeye alianza kuogopa. Kutokana na maswali aliyokuwa ameulizwa na akina Kabeya naye alianza kuamini kuwa wangeweza kuwa ndio wamemuua Mwadi, kwani walisema walikuwa wanaenda kumwona. Alisikia uchungu na huzuni kubwa juu ya Mwadi na akili yake ilivurugika aliposikia ya kwamba Muteba, mpenzi wake alikuwa anahusika na mauaji haya.
"Niambie Tete, muda unakimbia?" Willy aliuliza baada ya kuona kuwa Tete kweli kuna kitu alikuwa anakifahamu.
"Kwa nini usiende Polisi ukapige ripoti?" Tete aliuliza.
"Mimi sina haja ya Polisi, kama una haja ya Polisi nenda wewe, mimi ninataka unielekeze nani unafikiria?" Willy alijibu kwa mkato. Tete aliamua amweleze, maana kwa sababu asizozijua alikuwa anamchukia sana Kabeya, Hata alikuwa amewahi kumweleza Muteba juu ya chuki yake kwa Kabeya, lakini Muteba hakutilia manani jambo hili. Alikuwa anahisi kuwa Kabeya alikuwa mtu mbaya katika matendo yake, hata aliwahi kumfikiria kuwa angeweza kuwa jambazi. Sasa wasiwasi wake ulikuwa umethihirika, ila kilichokuwa kinamsikitisha ni kwa nini Muteba ajiingize kwenye matendo maovu ya mtu huyu. Alimjua Muteba fika, hivi alishangazwa na kitendo hiki ambacho kilikuwa hakilingani naye, kwani alikuwa mtu tajiri na mwenye kuheshimika kama yeye Tete alivyomjua kwa binafsi hivi aliamua amweleze Willy kwani kumficha kungekuwa na maana kwamba alikuwa amefurahishwa na mauaji ya Mwadi. kitu ambacho kingemhangaisha moyoni mwake. Aliinua kichwa chake akaangalia juu kwenye dari huku machozi yanaendelea kumtoka. Akiwa kama mtu ambaye yumo mwenye njozi alizungumza taratibu. "Nilifika hapa nyumbani kiasi cha saa kumi na robo hivi kutoka kazini. Kwa sababu Mwadi alikuwa ameeleza kuwa mtakuja nilifika hapa mapema ili kuwaandalia chakula cha jioni. Saa kumi na nusu hivi nikapata wageni. Wageni hawa walikuwa na rafiki yangu Muteba na rafiki yake Kabeya. Nilifurahi kumwona Muteba kwa sababu nilikuwa nimemtafuta kwenye simu bila kumpata. Niliwakaribisha halafu mimi nikaenda jikoni kuendelea na shughuli zangu. Kisha wote wawili wakaja jikoni ndipo Muteba akaanza kuniuliza juu ya uhusiano kati yako na Mwadi. Kwanza nilishangaa wamejuaje hizi habari lakini nikafikiria kuwa huenda walikuwa wameonana na Mwadi na amewaeleza. Najua kuwa Kabeya alikuwa anamtaka hivyo kuwapo kwake nilikuelewa. Niliwaeleza yote ninayojua kati yako na Mwadi. Vile vile waliniuliza lini ulifika hapa mjini, nikawaeleza kuwa ulifika Jumatatu iliyopita. Walizungumza wao wenyewe mambo fulani kuhusu majina, na Kabeya akasema kuwa Mwadi lazima ndiye anajua kwa nini jina lako halikuwemo. Sikuelewa maana yake na wala sikutilia maanani kiasi cha kuwauliza. Hivyo Kabeya aliaga akamwambia Muteba anaenda kumuona na Mwadi. Muteba alibaki nyuma, kwani nilimweleza kuwa wewe na Mwadi mngefika hapa kututembelea na kuwa nilikuwa nimemtafuta kwenye simu muda mrefu bila kumpata, na kwa vile alikuwa amekuja nilimuomba abaki kusudi tuwasubiri wote. Akakubaliana na mimi akasema naye alikuwa anapenda kuonana na wewe lakini anaomba aende nyumbani kwanza akabadilishe mavazi ndipo arudi. Tokea hapo hajarudi tena. Hayo ndiyo ninayoyajua", alimalizia Tete huku akiendelea kutazama juu.
"Huyu rafiki yako Muteba yeye anashughulika na nini?" aliuliza Willy kwa sauti ya huruma.
"Yeye ni mfanyabishara ana gereji yake inayoitwa Garage Baninga." Kusikia hivi moyo wa Willy uligonga haraka haraka kwani ilionekana watu wote wenye magereji hapa mjini Kinshasa walikuwa wameunda kundi la ujambazi.
"Mmefahamiana toka lini?"
"Tuna mwaka na nusu sasa. Maana tulifahamiana baada ya mimi kurudi mjini hapa kutoka Brazzaville ambako nilikuwa nafanya kazi, kwani mjomba wangu yuko huko. Wakati natafuta kazi ndipo nilionana naye na ni yeye aliyenitafutia kazi huko Sozidime," Tete alieleza. Willy alianza kuona mwanga mkubwa sana sasa. Kumbe Sozidime ilikuwa na uhusiano na haya magereji ya majambazi. Kitu hiki kilimpa dukuduku kubwa sana moyoni.
"Unajua huyu Kabeya anakaa wapi?" Willy aliuliza.
"Anakaa huko Yolo-Sud, barabara ya Ezo, nyumba nambari 32." Tete alijibu.
"Tete tafadhali sana usimwambie mtu yeyote kuwa umenieleza mambo haya jaribu kurudia hali yako ya kawaida, na hata mpenzi wako Muteba usimweleze, maana maisha yako yanaweza kuwa hatarini ukieleza mambo uliyonieleza. Mimi nakwenda nitakuja kukuona tena. Kifo cha Mwadi nimeapa nitalipiza", alisema Willy huku uchungu unampanda tena.
"Lakini hasa wewe ni nani, maana mawazo yangu yanaanza kukufikiria kwamba wewe si mfanyabiashara. Jinsi unavyofanya na jinsi ulivyo kama mcheza sinema." Tete alimuuliza huku sasa akiwa anamwangalia Willy.
"Kiasi unachokijua kinakutosha, kunijua sana kunaweza kukawa hatari kwako", alijibu Willy huku akisimama.
"Usiniache hapa Willy twende wote, nasikia woga tafadhali usiniache," Tete alianza kulia tena. Kwa vile Willy alikuwa bado ana shughuli ya kufanya alimwambia, "Wewe nenda ukalale kama una pombe kali, kama vile Whisky, kunywa halafu lala, mimi nitakuona baadaye," alimwacha Tete analia Willy aliondoka akaingia ndani ya gari na kukata shauri kwenda nyumbani kwa Kabeya. Aliomba amkute Kabeya nyumbani maana alikuwa amepatwa na hasira juu ya mauaji ya Mwadi. Alikuwa anajiona kuwa yeye ndiye chanzo cha kifo cha Mwadi, hivi mzigo wote wa kifo hiki aliamua kuubeba yeye mwenyewe binafsi. Wakati anaelekea nyumbani kwa Kabeya, mawazo yake yalikuwa yanafanyakazi sana. Habari alizokuwa amezipata kwa Tete zilianza kuleta picha yote ya mambo yalivyo. Ilikuwa inakaribia saa mbili wakati Willy alipowasili sehemu ya Yolo-Sud. Alitafuta barabara ya Ezo mpaka akaipata. Kuangalia nambari za nyumba alikuta ameingilia kwa juu kwani alikuta yuko nyumba nambari 110 hivi alianza kutelemka pole pole kwenye barabara hii mpaka akaiona nyumba nambari 32, akapitiliza mpaka mbele kidogo, akasimama na kutelemka na kuanza kurudi pole pole huku akiwa amejiweka tayari kabisa kwa mapambano ya aina yoyote.
Nyumba ya Kabeya ilikuwa imezungukwa na ua wa michongoma mifupi. Ilikuwa nyumba ndogo lakini nzuri. Willy alisikia furaha kwani aliona taa inawaka ndani ya nyumba hii kitu ambacho kilimaanisha kuwa kulikuwa na mtu ndani. Willy aliamua kuingilia nyumba hii kutokea nyuma. Hivi alizunguka nyumba hii kwa kupitia kati ya ua wa nyumba ya jirani na nyumba hii, na alitembea kana kwamba yeye ni mwenyeji wa sehemu hiyo ili wasiweze kumtilia mashaka. Alipofika nyuma ya nyumba hii aliruka ua na kutumbukia ndani ya ua wa nyumba hii. Alipotumbukia alianza kuizunguka nyumba hii kwa kunyatia na huku anasikiliza kama kulikuwa na mtu ndani. Alisikia mtu anapiga mluzi ndani, akawa na uhakika kabisa kuwa Kabeya alikuwepo maana ni mara chache kumsikia mtu asiyekuwa mwenye nyumba kupiga mluzi saa kama hizi ndani ya nyumba. Alikagua madirisha ya vyumba vya upande wa kulia akakuta yote yamefungwa. Alirudi nyuma ya hii nyumba akatoa funguo zake malaya, akaufungua mlango wa kutokea uani kwa uangalifu na utaratibu sana bila kufanya lolote. Alipoingia ndani alijikuta yuko jikoni. Huku akiwa katika tahadhari, bastola mkononi alifuata kule mluzi ulikokuwa unatokea. Alipofungua mlango wa jikoni alijikuta yuko sebuleni. Juu ya meza moja iliyokuwa na chupa ya primus, meza yenyewe ilikuwa karibu na makochi, hii chupa ilikuwa nusu na glasi iliyokuwa imejaa pombe. Hii ilimuonyesha Willy kuwa kulikuwa na mtu mmoja tu hapa ndani. Muziki ukiwa unatoka taratibu kwenye radio, mluzi uliendelea kusikika kutoka kwenye chumba kilichokuwa kushoto kwa Willy alipokuwa amesimama. Akisha viweka vitu vyote hivi maanani aliamua kuunguruma. Kabeya ambaye alikuwa na uhakika kuwa ni yeye.
Alinyata alikwenda mpaka kwenye ule mlango wa chumba na ghafla ule mlango wa chumba ulifunguka huku Willy akiwa ameiweka bastola yake mkononi ikiwa imemlenga mtu huyu aliyekuwa ndani ya chumba hiki akivaa nguo baada ya kukoga kama alivyoonekana.
Mtu huyu aliingiwa na hofu kubwa kwani ilionekana hakuwa kabisa anategemea kuwa jambo kama hili lingeweza kumtokea. "Weka mikono juu," Willy alimwambia huku anarudisha mlango. Mtu huyu ambaye alikuwa anafunga mkanda wa suruali, akiwa bado hajavaa viatu alifanya kama alivyoagizwa. "Nasikia ulikuwa unanitafuta, nimekuja sasa. Mwadi amenieleza kuwa ulikuwa kwake kiasi cha saa kumi na moja unaniulizia. Niulize mimi mwenyewe sasa maana Mwadi alishindwa kukujibu," Willy alimweleza kwa kebehi.
Kabeya alitetemeka kusikia maneno haya maana alikuwa ana uhakika kuwa alikuwa amemuua kabisa Mwadi kabla hajaondoka. "Mimi sijui unavyozungumza," Kabeya alijibu kwa hofu kwani sura ya Willy ilionyesha chuki kubwa sana,
"Sikiliza Kabeya, wewe ulikuwa unanitafuta mimi Willy, na ndiyo sababu umemuua Mwadi kwani Mwadi hakuweza kukueleza lolote juu yangu. Ukweli ni kwamba Mwadi alikuwa hajui lolote, lakini wewe hukutaka kumwamini mpaka umemuua, sasa mimi mwenyewe nimekuja niulize, la sivyo utaenda kuonana na Mwadi huko kwa Mungu mkashitakiane vizuri," Kabeya alijui sasa ndiyo mwisho wa maisha yake, maana jinsi alivyokuwa ameingiliwa alikuwa hana hamu tena kabisa. Moyo wake wote wa ujasiri uliyeyuka kama kipande cha samli kwenye kikaango. Alianza kujuta kwa nini alimsikiliza Muteba ajiunge naye. Kila wakati alikuwa akijuta siku moja mwisho wake utakuwa mbaya, pesa kupenda pesa kulikuwa kumemponza, aligwaya Kabeya rohoni.
"Kama huwezi kuniuliza mimi, mimi nitakuuliza wewe. Hii GAD Garage ni mali ya nani?" Bila hata kufikiria Kabeya alijibu.
"Ni mali ya mzungu mmoja aitwaye Jean, ni raia wa Ubelgiji".'
"Umefanya naye kazi kwa muda gani?"
"Miaka mitatu na nusu sasa".
"Je Muteba mna uhusiano gani?"
"Ni rafiki yangu, na tunatoka sehemu moja huko jimbo la Shaba. Ni marafiki wa siku nyingi. Muteba ndiye aliyenitafutia kazi na kunijulisha kwa Jean."
"Nieleze yote unayoyajua juu ya njama zinazofanyika kati ya gereji Baninga, Papadimitriou, GAD na kampuni ya wakala ya Sozidime. Usinifiche kwani kunificha unanunua tiketi ya kifo. Mimi ndiye jaji wako, naweza nikakuhukumu kufa au kukusamehe kutokana na ambavyo utakuwa tayari kushirikiana na mimi," Kabeya ambaye kwa kuogopa kufa alikuwa amesahau masharti yote ya 'WP' alianza kuropoka. "Wote wanachama wa 'WP' moyo wa Willy ulishtuka akauliza. 'Wp' maana yake ni nini?" Kabla Kabeya hajajibu walisikia gari linafunga breki mbele ya nyumba hii. Kabeya akakumbuka kitu kilichokuwa kimemruka mawazoni ya kwamba Charles alikuwa aje kumpitia hapa ili waende kwenye shughuli ya kuwasaka akina Ozu na Kofi. "Nani huyo?" Aliuliza Willy.
Kabeya akiwa amepata imani kidogo kuwa Charles akishirikiana naye angeweza kuokoka alijbu, "Sijui ni nani", Willy alijua amedanganywa. Charles akiwa pamoja na kijana mwingine waliingia moja kwa moja nyumbani kwa Kabeya kwani ni kitu ambacho walikizoea.
"Hey Kabeya uko wapi?" Charles aliuliza.
"Nakuja Charles," alijibu kwa sauti ya wasiwasi Kabeya.
Willy alijua sasa mambo yameiva kwa Charles ndiye alikuwa amekodi gari lile lililokuwa linamfuata Ozu kutoka S.T.K. Mawazo ya Willy yalifanya kazi haraka sana kwa sababu alijua sasa hali ya hatari hata kwake ilikuwa imetangazwa. Ilibidi acheze vizuri mchezo huu la sivyo wangeweza kumletea matatizo. Alisikia Charles anazungumza na mtu mwingine akajua wako watu wawili, hapo sebuleni. Aliangalia saa yake akaona muda umekwenda. Alimuonyesha ishara Kabeya afungue mlango atoke nje, huku akiwa amemlenga bastola. Kabeya alianza kupata moyo tena wa kijasiri akaamua hapa ndipo atajaribu kuokoa maisha yake. Willy alikuwa akimwangalia kila hatua yake. Kabeya alifungua mlango taratibu akatoka nje, Willy akiwa anamfuatia bastola mkononi. Ghafla kama umeme Kabeya alijitupa. Willy akafyatua risasi ikamkosa. Charles akatupa kimeza kidogo kilichopiga bastola na kutoka mikononi mwa Willy. Yule kijana mwingine alitoa bastola yake na kupiga risasi upande wa Willy, lakini aliruka kutoka pale kabla risasi haijafika, akamfikia Kabeya ambaye alikuwa anaanza kusimama na kumsukumia kwa nguvu sana kwa yule kijana mwenye bastola wakagongana huku bastola inafyatua risasi ovyo.
Charles ambaye alikuwa bado akili yake haijajua hasa nini kinatokea alimtwanga Willy teke la tumbo, lakini Willy akawahi kumshika na kumsukuma kwenye kochi ambalo alianguka nalo. Aliona bastola yake ilipokuwa kumbe na Kabeya ambaye alikuwa ameanguka juu ya yule kijana alikuwa na yeye ameiona. Hivi Willy alipoirukia na Kabeya naye alirukia wakafika wakati mmoja. Willy alimpiga kichwa kabeya na kuruka pembeni kabla yule kijana mwenye bastola hajapiga risasi. Yule kijana alipopiga risasi zilimkosa Willy lakini zilimpata Kabeya ambaye alikuwa hajiwezi kutokana na dhoruba ya kichwa alichopata toka kwa Willy. Risasi hizi zilimpiga Kabeya kichwani na kumjeruhi vibaya sana. Kitendo hili kilimshtua yule kijana, na kushtuka kwake kulimpa muda Willy kumrukia na kupiga teke bastola ile na ikaanguka sehemu nyingine ya chumba. Charles alikuwa amejiweka tayari lakini woga ulimwingia baada ya kuona kuwa Kabeya alikuwa amejeruhiwa vibaya sana kwa mikono yao wenyewe. Hata hivyo alijikaza akatupa konde moja safi sana, lililompata Willy na kumfanya apepesuke. Yule kijana alichukua nafasi hii akampiga Willy ngwala na kumuangusha chini. Charles alimrukia hapo chini lakini Willy alimwahi na kumpiga farasi teke akaanguka upande ule mwingine na wakati huo huo Willy akawa amesimama na kukabiliana na yule kijana mwingine. Yule kijana alitupa ngumi ya kwanza Willy akaiona, akatupa ya pili akaiona, akatupa ya tatu Willy akaiona na pale pale akatupa shoto lake alilokuwa ameliweka kwa nguvu zote na kumtwanga huyo kijana ambaye alianguka chini na kushindwa kuinuka. Willy alimgeukia Charles ambaye alikuwa amesimama kutoka pale akamwambia.
"Mimi nachukia wazungu ambao wanaokuja kufanya udhalimu katika Afrika, leo utaniambia." Akiwa amepandwa na mori na huku Charles naye akiwa amejawa na hasira walikabiliana kama mafahari ya ng'ombe. Charles alibadilisha akaanza kupiga karate, kumbe hakujua karate Willy ndiyo alikuwa mwenyewe. Walizipiga wakazipiga. Willy akaona huyu mtu anamchelewesha akambadilishia mitindo ya karate kama mitatu halafu akamfungia kazi ya kung-fu. Alimpiga na dhoruba moja ya kung-fu ambayo Charles hakuweza kuizuia, ikamdhoofisha sana. Willy alimrukia akashika kichwa chake na mabega akapanda na kuvunja shingo lake na kumuua pale pale. Wakati anazipiga na Charles alikuwa vile vile anaangalia kama yule kijana ameamka ama vipi. Mara hii alipogeuka baada kumuua, alikuta yule kijana anainua bastola huku akitetemeka karibu kufyatua risasi. Wily aliwahi tena kuruka kabla risasi hazijamiminika pale alipokuwa, na pale aliporukia palikuwa karibu na pale Kabeya alipokuwa amelala na bastola yake ilikuwa karibu pale. Hivi alipotua pale tu alinyanyua bastola na kuwahi kumpiga yule kijana risasi na kumwua pale pale.
Willy alisimama bastola mkononi akamwendea Kabeya. Hali ya Kabeya ilikuwa mbaya sana kiasi cha kwamba angeweza kukata roho wakati wowote. Willy alimtingisha na kumuuliza, 'WP' ni chama gani," Kabeya aliinua macho na kumwangalia Willy huku sauti ikiwa inafifia alisema, "White po... po... power," halafu akakata roho. Willy aliondoka ndani ya nyumba hiyo huku akitembea haraka haraka aliingia ndani ya gari lake na kuelekea nyumbani kwa Robert.

Ilikuwa saa tatu na dakika kumi Willy alipowasili nyumbani kwa Robert. Alipoingia ndani alikuta wenzake wote wako tayari na wanamsubiri kwa hamu. Kule kuingia tu wenzake walijua jambo kubwa lilikuwa limetokea kwani sura yake ilikuwa imebadilika kabisa na kwenye bega shati lake lilikuwa na damu. Aliondoka akiwa amevaa suti lakini sasa alikuwa hakuvaa koti na wala tai hii yote ilidhihirisha kuwa huko alikokuwa mambo yalikuwa yamechafuka. Wote walikaa kimya huku wanamwangalia. Willy alienda akaketi kwenye kochi na Robert akamletea glasi ya whisky. Willy alianza kuwasilimulia kwa kinaganaga mambo yote yaliyokuwa yametokea toka alipoondoka mpaka wakati huo alipokuwa amerudi.

"Hii ina maana kuwa kuna chama au kikundi kinachoitwa White Power. Tukigundua kikundi hiki ni kikundi gani na kina madhumuni gani, na kwa nini kinaua ndugu zetu wapigania uhuru basi kazi yetu itakuwa imekamilika," Willy aliwaambia. Wenzake waliokuwa wanamsikiliza kwa makini, walionyesha sura ya masikitiko sana.

"Ingawa nilikuwa sijamwona Mwadi, nimehudhunishwa sana na tukio hili," alisema Kofi. Ozu na Robert nao walitingisha vichwa kuonyesha kuwa na wao walisikitishwa sana na mauaji haya ya kishenzi.

"Kama nilivyofikiria toka mwanzo baada ya kufanya upelelezi wangu kuwa kampuni yoyote iliyokuwa inawakilisha maslahi ya makaburu kiuchumi lazima itakuwa inashughulikia na maslahi mengine ya kisiasa kwa makaburu, sasa naanza kuona mwanga kabisa kwa haya magereji na hii kampuni ya wakala ya Sozidime ni ofisi za kijasusi za makaburu wanazozitumia huku wakidanganya watu kuwa zinashughulikia biashara. Kama Kofi alivyoeleza, nakubaliana naye kuwa watu wenye magereji haya na kampuni hiyo ni majasusi. Hii ndiyo sababu wameweza kufanya uhalifu mkubwa bila kujulikana kwa sababu wote hawa ni majasusi wa ujuzi wa hali ya juu kiasi cha kwamba idara ya polisi au ya upelelezi ya nchi ya Kiafrika ni vigumu kuwagundua. Hivyo hii habari ya watu hawa kuwa na gereji ni geresha tu ya kuficha shughuli zao hasa," alisema Robert kwa kirefu.

"Nafikiri ingekuwa rahisi kwetu kukikabili kikundi hiki cha 'WP' kama serikali ya Zaire ingekuwa inajua tuko hapa kwa sababu ya shughuli hiyo. Maana najua kuanzia sasa lazima tuwe macho maana tunaweza tukajikuta mikononi mwa polisi kabla hatujatekeleza shughuli yenyewe," alisema Ozu.

"Maneno yako ni sawa, lakini tatizo tulilonalo ni kwamba msimamo wa serikali ya Zaire juu ya jambo kama hili haujulikani bado. Nafikiri hii ndiyo sababu tumetumwa hapa kisiri kwa sababu ofisi inayoshughulikia jambo hili nayo haijawa na uhakika na msimamo wa serikali ya Zaire. Lakini hata hivyo inabidi itabidi Robert amwambie Chifu juu ya matatizo tunayoweza kuyakabili kama serikali ya Zaire haitakuwa na habari yoyote kuhusu sisi. Uamzi atakatoa ndiyo huo tutaufuata, kwa sasa hivi sisi tuendelee na shughuli hizi kisiri kama tulivyoagizwa," alifafanua Willy.

"Sisi tuko tayari kwenda huko "GAD GARAGE' kama tulivyokuwa tumepanga nafikiri kazi uliyoifanya kwa leo imetosha, wewe baki sisi twende," Ozu alimshauri Willy.

"Hata kidogo, kazi tunayoenda kuifanya ni ngumu, hivi lazima twende wote ila Robert itambidi abaki", Willy alieleza.

"Hapana, na mimi lazima niende, lazima na mimi nipewe nafasi ya kupambana na watu hawa." Robert alilalamika.

"Si hivyo, shughuli hii ni kubwa hivi hatuwezi kwenda wote kwa pamoja, tutakuwa tunafanya mchezo. Kwanza wewe ni mtu ambaye huwezi kukisiwa kwa jambo lolote ovu na mtu yeyote hivyo lazima ubaki kama akiba yetu kwa wakati mbaya zaidi. Vile vile itabidi ubaki ili uweze kuzungumza na ofisi yetu ya Lusaka, kusudi uweze kuwaeleza yote yaliyotokea vile vile wakueleze kama wana habari zozote," Willy alimweleza.

"Sawa kabisa, lazima Robert abaki," Ozu alikubaliana na Willy.

"Na mimi nakubaliana na nyinyi kabisa, lazima Robert abaki kwa usalama wetu baadaye," Kofi alimuunga mkono.

"Haya wengi wape", alijibu Robert kwa masikitiko.

"Wewe ni balozi bwana tuachie sisi huu unyama", Ozu alimtania.

"Nimeishiwa risasi, Robert nisaidie," Willy aliomba.

Robert aliingia chumbani na kurudi na pakiti mbili za risasi. Willy alijaza bastola yake halafu akawauliza kama wenziwe walikuwa wanahitaji nao.

"Sisi tuko tayari kabisa", Ozu alijibu. Kofi alionyesha bastola zake mbili alizokuwa ameisha zijaza risasi tayari. Willy aliwagawia wenzake risasi za akiba. Roberti alimletea Willy shati la kubadilisha. baada ya hapo wakaondoka kuelekea 'GARAGE GAD'

Saa hizi saa tatu za usiku, Pierre alikuwa nyumbani kwake akingojea kwa hamu kupata maelezo kamili, juu ya msako uliokuwa ukiendelea. Alikuwa ameishapata ripoti kutoka kwa Muteba, kuhusu maelezo waliyokuwa wameyapata toka kwa Tete juu ya Willy. Vile vile alimweleza kuwa Kabaya alipokwenda kumwona Mwadi alihisi kuwa Mwadi alikuwa anajua mengi juu ya Willy lakini hakutaka kueleza hivi Kabeya akamuua.

"Ni dhahiri kuwa huyu Willy ni mpelelezi, mmoja wa wale wengine, kwa hivi katika msako wetu na yeye yumo," Muteba alikuwa amemweleza. Akiwa anangojea ripoti wa Pierre alikuwa na wasiwasi sana juu ya wapelelezi hawa. Mara simu ililia akainua haraka haraka.

"Hallo," aliita.

"Patron, Muteba hapa, kumetokea mauaji mengine kwa upande wetu. Kabeya, Charles na Ngoma wameuawa. Bila shaka wameuawa na huyu Willy." KWa sauti ya utaratibu Pierre aliuliza.

"Unazungumzia wapi?|

"Nipo nyumbani kwa Kabeya".

"Wape habari Jean na Papa kuwa wote njooni tuonane hapa," Pierre aliamru na kukata simu.USIKU WA KAZI

Wakati wanaelekea gereji G.A.D. Willy aliwaeleza wenziwe mpango aliokuwa nao juu ya mashambulizi ya usiku huu. Baada ya mabishano kwenye mambo fulani fulani walikubaliana mpango huo. "Kwa hiyo jamani usiku huu utakuwa ni usiku wa kazi kubwa," Willy alimalizia.

"Tumwombe Mungu." OZu alisema.

"Mungu atatusaidia, maana sisi tunachopigania ni haki za ndugu zetu huko Kusini mwa Afrika na wala hatumuonei mtu," Kofi aliongezea.

Gereji G.A.D. ilikuwa sehemu za Gombe barabara ya T.S.F karibu na stesheni ya Televisheni lakini kwa upande mwingine. Willy alikuwa ameitafuta gereji hii wakati wa mchana na alikuwa ameiangalia kwa uangalifu sana. Basi akiwa anaendesha kwenye hi barabara ya 30 Juin alikata kona na kuingia barabara ya T.S.F. Akiwa anaendesha kwa mwendo wa kawaida alipita mbele ya gereji.

Ozu aliangalia saa yake ilikuwa ni saa nne kasoro. "Bado mapema sana, tungoje mpaka watakapofunga stesheni hapo saa tano," Ozu alishauri.

"Hata mimi naona hivyo maana hata mitaa ya huku bado ina watu, waweza kutuletea kisanga," Willy alisema, Kofi ambaye macho yake na mawazo yake yalikuwa kwenye hilo jengo la G.A.D. aliangalia ingawaje kwa upesi na kuona kuwa kulikuwa na walinzi upande ule wa mbele wa jengo hili.

"Kutakuwa na ulinzi mkali kwenye jengo hilo baada ya tukio la jana," aliwaeleza wenziwe.

"Lazima tutegemee hivyo," alijibu Ozu. Willy alienda mbele kidogo akageuza gari na kurudi huku wakipita kwa kasi sana mbele ya jengo hilo.

"Naona twende Cafe de la Paix tukapoteze muda pale, nadhani ni mahali penye usalama wa kutosha", Willy alishauri.

"Pale ni pazuri sana, tunaweza tukauwa hii saa moja pale bila shida," alijibu Kofi. Cafe de la Pix iko barabara ya 30 Juin. Willy aliendesha gari hadi pale, akaliegesha wakatelemka.

"Tukae kwenye viti vye nje", alisema Willy. Walikaa hapo nje na wakaagiza vinywaji. Kila mmoja wao aliagiza Whiski. Wakati wakiendelea na kinywaji chao Willy alimwita mfanyakazi mmoja aliyepita pale karibu.

"Samahani ndugu naomba kukuuliza", Willy alimwambia.

"Bila samahani", alijibu.

"Unaijua gereji Baninga?"

"Ndiyo".

"Iko wapi?"

"Iko huko sehemu za Kintambo, barabara ya Bangala iko karibu na shule."

"Asante sana nimeelewa", Willy alijibu na yule mtu aliondoka.

Mahali penyewe nimepafahamu sasa nimeishafika pale. Mbele ya ile shule kuna kiwanja cha mpira na gereji hii inatazamana na goli la mwisho kama ukiwa unatokea Kasavubu", alieleza Kofi.

"Basi hamna taabu," alijibu Ozu. Ilipotimia saa tano, waliondoka na kuingia ndani ya gari lao na kuelekea gereji G.A.D. Walipoingia barabara ya T.S.F. waliegesha gari lao karibu na majengo ya stesheni ya Televisheni na wote wakatelemka. Wakati wafanyakazi wa stesheni ya Televisheni walikuwa wamemaliza zamu yao ya saa tano walikuwa wanaishiaishia kuondoka. Kwa hivi kuegesha gari lao wakati ule ilikuwa vigumu kutambulika.

"Mimi na Kofi tutatangulia kuingia ndani. Ozu atatufuata mara tu ukisikia mlio wa bunduki", Willy alieleza.

"Vizuri," alijibu Ozu.

"G.A.D. Gaereji" ilikuwa imejengwa kwa mtindo sawa na 'Garage Papadimtriuo' Willy na Kofi waliamua kuingilia gereji hii kwa kupitia nyuma. Waliingia kwenye uchochoro uliokuwa kati ya nyumba ya pili na ya tatu toka kwenye gereji na kuelekea nyuma ya nyumba hizi na nyumba ya barabara ya pili.

Walitembea kwa tahadhari kubwa, lakini walipofika nyuma ya ngome ya gereji hawakukuta ulinzi wowote.

"Nitatangulia mimi", Kofi alimnong'oneza Willy. Kofi alipanda juu ya mabega ya Willy akashika juu kabisa ya ngome. Aliangaza chini akakuta yuko nyuma ya ofisi kama vile alivyoona kule 'Gereji Papadimitriuos'. Hakukuwa na mlinzi yeyote kitu kilichomshangaza sana. kwani baada ya tukio la jana alitegemea kukuta ulinzi mkali kwenye magereji ya hawa watu. Alipanda juu akajitandaza juu ya ukuta wa ngome kisha akampa Willy mkono wake na kumvuta ili kumsaidia kupanda. Walipokuwa wamepanda wote ukuta walitelemka taratibu na kuangukia ndani ya ngome.

"Kama nyumba hii imejengwa kama ile ya Papadimitriuo, kuna dirisha kubwa kuzidi hili la nyuma kwa upande wa kushoto. Dirisha hili liko kwenye chumba cha mkutano, Tukiweza kupita humo tutakuwa tumeingia ndani ya chumba cha mkutano," Kofi alimnong'oneza Willy.

"Tutajaribu kupitia huko", Willy alijibu.

Walipoenda kwenye pembe ya upande wa kushoto Willy aliona kuna mlango upande ule, na wakati akichungulia mlango huo ulifunguliwa. Alimfanyia ishara Kofi na kumtahadharisha. Watu wapatao sita wakiwa na bunduki kubwa kubwa, walitokea kwenye mlango huu. Willy alishukuru bahati yao nzuri kwani alitambua kuwa walikuwa wamewawahi wakati watu hawa aidha akijitayarisha au wakihutubiwa. Ilionekana watu hawa hawakutegemea shambulio lolote kabla ya saa sita, watu wanne kati ya hawa sita walielekea upande wa mbele wa nyumba na wawili walielekea upande huu wa nyuma ambako Willy na Kofi walikuwa.

"Watu wawili wanakuja huku", Willy alimnong'oneza Kofi. Walijibanza sawa na ukuta kusubiri. Watu hawa bila kujua kuna nini walikuja wanazungumza pole pole. Walipofika kwenye pembe hii ya kwenda nyuma wakasimama wakaweka silaha zao tayari. Kwa sababu hapakuwa na mwanga wa kutosha hawakuweza kuwaona upesi akina Willy kwa namna walivyokuwa wamejibanza kwenye ukuta. Willy alimwacha yule wa mbele akampita kidogo, yule wa pili aliyekuwa anafuata wenzake karibu karibu huku wanaangalia kwenye ngome alimgusa Willy maana alipita karibu sana na ukuta. Kugutuka tu Kofi na Willy waliwashambulia kabla akili zao hazijajua ni nini kinatokea. Kofi alimshambulia yule wa mbele na Willy yule wa nyuma. Watu hawa walipigwa na kuwaua kwa mikoni bila hata kupiga kelele. Pala karibu kulikuwa na gari bovu wakalifungua wakarundika maiti za watu hawa humo ndani zikafichika. Walipoangalia zile bunduki wakakuta ni 'machine gun' ambazo zilikuwa zimeishapakiwa risasi tayari kwa kutumika.

"Loo tumepata silaha, sheria yake", alisema Kofi huku anaipima pima bunduki aliyochukua kutoka kwa yule mtu aliyemuua. Willy naye alichukua ile ya mtu mwingine.

"Nia yangu ni kutaka kuingia ndani, hivyo tutaingilia kwenye mlango huo waliotokea hawa watu", Willy alimnong'oneza Kofi.

"Sawa". KOfi alijibu. Wakiwa sasa wamebeba hizi 'machine gun' tayari tayari walielekea kwenye mlango. Walipofika kwenye ule mlango Wili aliweka sikio kwenye tundu la kuwekea ufunguo wa kufungulia, lakini hakusikia kitu. Alijaribu mlango akakuta umefungwa. Alitoa funguo zake malaya, akafungua kufuli taratibu bila kelele. Wakati huo Kofi alikuwa tayari tayari kwa lolote ambalo lingeweza kutokea. Walifungua mlango, na kuingia ndani na kufunga tena na funguo. Walijikuta wamo kwenye chumba kikubwa ambacho hakikukwa na kitu chochote ndani.

"Nafikiri wanachukulia mazoezi humu." Kofi alisema.

"Nafikiri", Willy alijibu kwa mkato. Walienda na kujaribu mlango mwingine wa kutokea ndani, wakakuta haukufungwa. Willy aliufungua taratibu akachungulia, hakukuwa na mtu ukumbini, akamfanyia Kofi ishara, wakajitokea ukumbini. Chumba kilikuwa kinatazamana na chumba walichokuwa wametoka kilikuwa kimewekwa kibao kilichoandikwa 'MKURUGENZI' Willy alimuonyesha Kofi ishara kuwa alikuwa anataka waingie mle. Willy alijaribu ule mlango akakuta umefungwa, alitoa funguo zake malaya akajaribu tena zikafungua, wakaingia ndani na kujifungia. Kofi alitoa kurunzi ndogo mfukoni akaangaza kwenye meza kubwa iliyokuwemo, mbele ya meza kulikuwa na kibao kilichoandikwa "Jean Vergence" Hiki kibao kiliwafahamisha kuwa hii ofisi ilikuwa ni ya mwenye gereji. Willy alichukua kurunzi kutoka kwa Kofi akaanza kuangaza kwenye ukuta. Nyuma ya kiti kwenye meza hii kulikuwa na kabati la chuma. Willy alifikiria kuwa humo ndani ya hili kabati ndimo kungekuwa na makaratasi ya maana ambayo yangeweza kuwasaidia katika shughuli zao. Alisogelea kabati akaanza kulichunguza kama angeweza kulifungua. Kofi naye alisogea na kuliangalia. Willy alitoa fungu la funguo malaya zikiwemo funguo kadhaa malaya za kufungulia makabati kama haya. Funguo hizi alikuwa amezichukua kwani alitegemea matatizo kama haya. Alijaribu ufunguo wa kwanza lakini haukufungua, alijaribu wa pili nao ulikataa, alipojaribu wa tatu ukafungua. Ndani ya kabati hili la chuma mlikuwa na sanduku dogo la fedha. Willy hakuwa anatafuta hicho hivyo alimulika mle ndani vizuri akaona mlikuwa na saraka ndani. Alivuta akakuta imefungwa alitoa funguo zake malaya tena akaanza kujaribu kufuli la saraka hii, kwa bahati alipojaribu tu mara moja ikafunguka. Alipovuta akakuta mna bahasha moja kubwa akaitoa na kuifungua. Mara akasimama na bahasha yake mkononi.

"Hawa watu wamekwenda wapi?" walisikia mtu anauliza ukumbini.

"Hatujui maana sisi tulikuwa wanne tulioelekea mbele na wenyewe wakaelekea nyuma ya ofisi kama walivyotupanga, sasa hatuelewi imekuwaje..." sauti nyingine ilijibu. Walisikia mlango wa kile chumba walichoingilia unafunguliwa na sauti ikapotea.

"Wanawatafuta, watawaona sasa hivi." Kofi alinong'ona.

"Tuondoke humu", Willy alijibu.

Willy aliweka bahasha aliyokuwa ameichukua vizuri ndani ya shati, akafunga mkanda wake wa suruali sawa sawa, akafungua mlango akiwa 'machine gun' yake ameiweka begani na bastola mkononi tayari kukabiri hatari yoyote. Kofi naye alitoka nyuma ya Willy na kurudisha mlango. Ghafla mlango wa mbele wa nyumba ulifunguliwa na mlango wa kile chumba kikubwa nao ukafunguliwa. Kwa sababu taa ilikuwa inawaka ukumbini wale watu waliofungua milango hii walionana ana kwa ana na Kofi na Willy. Wale watu walizubaa kidogo maana wao hawakutegemea kukutana na mtu yeyote ukumbini. Yule wa mbele alitaka kurudisha mlango lakini Willy aliwahi kumpiga risasi kabla yeye hajaweza kufanya hivyo. Alipoanguka chini bastola yake ilifyatuka na kufanya kelele nyingi. Bastola za akina Willy zilikuwa hazikufanya kelele kwani walikuwa wakitumia sailensa.

Baada ya mlio huu wa bastola, walisikia watu wanakimbia kwa nje. Kusikia hivi wakajua mambo yameiva. Waliweka bastola mifukoni, na kushikilia 'machine gun' vizuri. Kisha wakaruka ndani ya chumba kikubwa, wakasubiri kwani walisikia nyayo zikija, kwa upande wa mlango wa kutokea nje wa chumba hiki. Mara mlango ukafunguliwa kwa teke na risasi zikamiminika ndani ya chumba hiki, wao wakabana kabisa kwenye ukuta. Yule mtu aliyekuwa anamimina risasi alipohakikisha kwamba hakuna mtu, aliingia ndani na hapo ndipo alishambuliwa na Kofi aliyemwauza kwa risasi. Walipokwisha kufanya hivi walitoka nje kwa kutokea mlango walioingilia pembeni mwa nyumba hii. Kofi aliekea nyuma na Willy akaelekea mbele ya nyumba hii. Wakaanza mashambulizi thabiti.

Ozu aliyekuwa amejificha kwenye uchochoro mmoja karibu na gereji hii, aliposikia mlio tu wa bunduki alijua kuwa kazi imeanza. Alikimbia mpaka kwenye lango la mbele, na kama alivyofikiria alikuta walinzi waliokuwa pale mlangoni wanakimbilia ndani kufuata mlio wa bunduki ulikotokea. Hivi hakupata upinzani wa aina yoyote pale langoni, kwa bahati alikuta lango limerudishwa tu bila kufungwa. Alisukuma lile lango na kuingia ndani, huku akiwa amejikinga mwenye magari mabovu akielekea kule kwenye ofisi ambako ndiko kulikuwa kunatokea milio ya bunduki.

Masamba ambaye ndiye alikuwa ameachiwa jukumu la kulinda gereji hii wakati Jean ameondoka alijikuta katika wakati mgumu sana. Alikuwa ameachiwa walinzi sita wakiwemo wapiganaji bunduki sita hodari sana. Yeye mwenyewe alikuwa muuaji hodari wa 'WP'. Na kazi hii alikuwa ameitekeleza vizuri kabisa kila alipokuwa ameamriwa kufanya. Akiwa katika ofisi yake, na huku akisikia mapigano yanaendelea huko nje, aliinua 'machine gun' yake na akachukua bastola mbili akaondoka tayari kwa kusaidia walinzi wake kwenye uwanja wa mapambano. Willy na Kofi walikuwa wamewazingira walinzi wa gereji hii. Ilikuwa rahisi kwao kuwazingira kwani walinzi hawa walikuwa wamekimbilia kule mlio wa bunduki ulikuwa bila kwunza kuangalia mambo yanakwendaje. Walitupiana risasi na Kofi kwa upande ule wa nyuma ya ofisi. Willy ambaye aliwaingilia kwa kutokea mbele hawakumuona, wao walifikiria wako kule risasi zilikokuwa zinatokea tu.

Willy alitambaa juu huku akiwa amezuiwa na magari haya mavovu. Kofi aliendelea kijibishana risasi na hawa watu ili kumpta nafasi Willy kuwashambulia kwa nyuma bila wao kutambua. Willy alipofika karibu kabisa nao, aliweza kuona jinsi walivyokuwa wamejipanga. Alitoa bastola yake na kuwapiga walinzi wawili risasi waliokuwa karibu naye. Kwa sababu bastola yake ilikuwa na sailensa wale walinzi wengine hawakutambua maana kulikuwa na giza. Akasogea tena mpaka akawakaribia wengine wawili nao akawapiga risasi, mmoja wao haikumpata vizuri hivi akageunza na kuanza kupiga risasi upande ule wa Willy alikokuwa lakini Willy alimuwahi na kummaliza. Tukio hili ndilo liliwafahamisha walinzi waliokuwa wamebaki kuwa walikuwa wameishaingiliwa kwa nyuma. Kwa hofu walianza kupiga risasi hovyo hii ikampa nafasi Kofi kutoka kwenye kona aliyokuwa amejibanza na kushambulia watu hawa kwa 'machine gun'. Wawili kati ya walinzi hawa waliuawa, na mmoja alitupa silaha yake akakimbilia mwenyewe magari kuelekea mlangoni.

Willy walikutana na Kofi na kujibanza kwenye gari moja.

"Naona tumewamaliza", alidai Kofi.

"Sina uhakika", alijibu Willy.

Ozu aiyekuwa anatafuta mlio wa bunduki taratibu na kwa tahadhari kubwa alijigonga kwenye kitu. Alipoangalia amejigonga kwenye nini, akakuta ni mdomo wa tanki la petroli, linalopeleka petrol ndani ya gereji. Mara mawazo yake yakashituliwa kwani aliona mlango wa mbele unafunguliwa. Aliona mtu anachungulia kwa uangalifu sana halafu akatokeza akiwa ameshikilia bunduki yake tayari. Ozu aliona huyo si Kofi wala Willy, hivi akamwendea. Alichukua jiwe akalitupa nyuma ya huyu mtu. Mtu huyu aligeuka kama umeme huku akimimina risasi. Ozu alichukua nafasi hii akampiga risasi ambayo ilimpata huyu mtu kwenye bega, akatupa bunduki yake na kuruka wakati huo huo nyuma ya gari mojawapo, Masamba alijua huu ndiyo mwisho wa maisha yake. Hakujua mtu aliyekuwa amempiga risasi alikuwa amepiga kutokea sehemu gani. Alifikiria kukimbia lakini akaona hakuna njia ya kutoka sehemu hii, hivi aliamua apigane na watu hawa mpaka mwisho wake.

"Lazima Ozu ameingia unasikia mlio huo," Kofi alimnong'oneza Willy.

"Kumbe bado kuna walinzi, wewe zunguka ulikotokea, mimi nitarudi nilikotokea. Ukifika kwenye pembe ya nyuma na ya upande wa kushoto piga risasi, hii itanipa mimi nafasi ya kuwaingia watu hawa kumsaidia Ozu," Willy alieleza. Ozu alijua amempiga yule mtu risasi, lakini haikuwa imemuingia sana kwa kutokana na yule mtu alivyoruka baada ya kupigwa risasi. Ilimdhihirishia Ozu kuwa mtu huyu alikuwa ni hodari, hivi alikata shauri amwendee kwa pupa. Mara alisikia risasi zinalia upande aliokuwa ameangukia huyu mtu. Hii ikampa nafasi Ozu na Willy kujua mtu huyu alikuwa wapi. Ozu alipiga risasi mahali pale ambako Masamba alikuwa . Masamba alijiviringisha kutoka mahali pale lakini Willy akamuona na kumwachia risasi chungu nzima, na kumuua pale pale. Baada ya hapo kila mmoja wao alijibanza kukawa kimya. Ozu alipiga mluzi ambao ulikuwa ni wa kujijulisha. Willy alijibu halafu Ozu akabibu walisubiri tena kidogo kuhakikisha kuwa hakuna mtu mwingine ndipo wakapigiana mluzi wa kuondoka. Wakati wanakutanika mbele ya ofisi hii ndipo waliona yule mlinzi mmoja aliyekuwa ametupa bunduki yake na kukimbia akipitia kwenye lango na kukimbia nje.

"Huyo mmoja amewahi kutoroka", Ozu aliwaonyesha.

"Tuondoke hapa, maana polisi au kundi la watu hawa linaweza kufika wakati wowote", Willy alishauri.

"Pale mbele nimeona mahali ambapo tanki ya petrol lilipochimbuliwa, mnaonaje tukilipua gereji isionekane tena kabisa?" Alieleza Ozu.

"Wazo zuri sana, hakika tukilipua gereji hii tutakuwa tumebomoa kambi moja ya hawa wadhalimu na kubakiwa na makambi mawili ambayo vile vile itabidi tuyalipue,"alijibu Willy. Ozu alichukua machine gun iliyokuwa imetupwa na Masamba, na haraka haraka wakakimbilia pale kwenye mdomo wa tanki. Mfuniko wa mdomo wa tanki ulikuwa umefungwa na kufuli. Ozu alipiga kufuli kwa risasi likasambaa na akafungua mfuniko wa tanki hili. Tanki lilikuwa limejaa petroli.

"Tangulieni," Ozu aliwashauri. Willy na Kofi walikimbia kwenye uficho na kumwacha Ozu akishughulika. Ozu alichukua kitambaa chake, akakilowanisha ndani ya petroli akachukua kiberiti toka mfukoni kwake, akaenda mbele hatua chache halafu, akakiweka kile kitambaa moto, akakitupa pale kwenye mdomo wa tanki akaondoka mbio. Kufika mlangoni akakuta akina Willy wameshafika ndani ya gari, akarukia na wakaondoka kasi. Walipofika kwenye kona ya T.S.F. na 30 Juin walisimama kidogo kungojea kama mlipuko utatokea au vipi! Lakini waliona gari la polisi linakuja ikabidi waondoke.

"Tunaelekea 'Garage Baninga'... kabla hata Willy hajamaliza kusema, kulitokea mlipuko mkubwa ambao uliitingisha sehemu nzima ya Gombe.

Yule mlinzi aliyetoroka kutoka ndani ya ile gereji, alikimbia mpaka kwenye kibanda cha simu kilichokuwa karibu. Alipiga simu kwenye nambari ya simu waliyokuwa wamepewa kupiga kama jambo lolote litatokea.

"Hallo," aliita.

"Hallo unasemaje?" Sauti ilijibu.

"G.A.D." alijibu.

"WP", alijibiwa.

"Aha, G.A.D imeshambuliwa tafadhali tumeni msaada upesi sana kama kikosi kizima kinatushambulia," alieleza huku akitetemeka.

"Sawa," alijibiwa na simu ikakatwa. Pierre na wenzake walikuwa wamemaliza mkutano wao uliokuwa umeitishwa usiku ule wakati simu wakati simu ilipolia. Pierre aliinua simu, "Hallo", aliita.

"Patron?" aliulizwa.

"Ndito", alijibu. 'G.A.D. inashambuliwa sasa hivi. Mapambano bado yanaendelea, nimetuma watu wengine kwenda kusaidia kutoka Papadimitriou," alielezwa.

"Vizuri tunakuja," alijibu na kukata simu. "G.A.D. inashambuliwa twendeni", aliwaeleza wenzake kwa kifupi.

"Hapana Patron, wewe baki sisi tutaenda kule hatuwezi kwenda wote", Jean alishauri.

"Ndiyo sisi tutakwenda wewe baki", Papa alikubaliana na Jean

"Mkiwakuta watu hawa tafadhali wauweni kabisa, sina haja ya kuwahoji, wameishafanya ubaya mwingi kiasi cha kuonana nao. Mimi nitawapa muda wa kutangulia halafu nitampigia afisa mmoja wa polisi rafiki yangu kuwa wezi wanashambulia gereji 'G.A.D.", alieleza Pierre. Kisha aliingia ndani ya stoo akatoa bunduki na mabomu ya mikono akawapa hawa wenzake na wakaondoka wakiwa tayari kwa mapambano huko G.A.D.

Ni wakati walipokuwa wanaingia barabara ya Bokasa waliposikia mlipuko mkubwa uliotingisha sehemu nzima ya Gombe. Waliongeza mwendo na walipofika kwenye kona ya barabara ya 30 Juin na T.S.F. ndipo walipotambua kilichokuwa kimetokea kwani, watu wote waliokuwa wanakaa sehemu hiyo walikuwa wanakimbia ovyo kwa hofu. Walipofika sehemu ya 'Gereji G.A.D' ilipokuwa imesimama hawakukuta kitu. Tokea majengo, magari na kila kitu kilichokuwemo ndani ya sehemu ile kiliteketezwa. Nyumba zilizokuwa jirani nazo ziliharibika ingawaje si sana, maana ngome ya gereji ilizisaidia kustahimili mlipuko huu, kwani ngome yote nayo ilianguka.

"Hakika hawa watu ni wanaharamu sana," alisema Jean kwa chuki. Mara wakasikia milio ya magari ya polisi na zimamoto unaelekea sehemu hii.

Walinzi waliokuwa wametokea Gereji Papadimitriou walifika nao wamechelewa.

"Rudini sehemu zenu", Papa alimwelezea kiongozi wa watu hawa. Papa, Muteba na Jean waliingia ndani ya gari lao na kuelekea gereji ya Papadimitriou katika uchunguzi mwingine.

Wakati Willy na wenzake wakielekea gereji Baninga. Kofi aliwaeleza namna gereji ile ilivyokaa maana aliwahi kufika kwenye gereji hii alipokuwa ameharibikiwa na gari, safari moja alipokuwa hapa mjini Kinshasa. "Gereji yenyewe imezungukwa kwa ua wa seng'enge na uwanja wake ni mkubwa kuliko G.A.D. Kuna stesheni ya petroli nje tu ya gereji, na stesheni hii ni mali ya gereji hii. Hivi nina imani kuwa tanki la petroli la stesheni hii litakuwa ndani ya ua wa gereji kwa usalama. Kuna majengo mawili makubwa mojawapo likiwa ni ofisi na moja linatengeneza kivuli cha magari. Kitu kingine cha kufikiria ni kwamba katika sehemu hii ya Kintambo kuna kambi ya jeshi ambayo iko karibu nusu maili kutoka kwenye gereji hii. Nafikiri maelezo haya yatawapa mwanga jinsi gani tutakavyoiingilia gereji hii", alimaliza Kofi.

"Kama ni hivyo, mimi naona ya kwamba uzi uwe ule ule. Tukifika pale mashambulizi yetu yawe ya moja kwa moja. Ozu kazi yake itakuwa kutafuta mdomo wa tanki uko wapi wakati sisi tukipambana na walinzi watakaokuwepo. Ozu akishapata mdomo huu, atapiga risasi hewani kutupa ishara, halafu atafanya kama alivyofanya kule na kuondoka. Shambulizi hili itabidi tulifanye kwa muda mfupi sana ili tusiwape nafasi wanajeshi kutuwahi. Kwani ikiwa watasikia mlio wa bunduki lazima watakuja. Nataka wafike wakati sisi tumeishaondoka," alishauri Willy.

"Hamna taabu silaha tulizonazo zinatosha kabisa kuzuia jeshi zima", alisema Ozu ambaye alikuwa anafurahishwa sana na matukio ya usiku huu. Yeye kama wenzake alipenda sana kashikashi za namna hii. Walipofika barabara ya Bangala walisimamisha gari karibu na shule halafu walichukua silaha zao na kuanza kukiimbilia gereji Baninga. Kila mtu alichukua sehemu yake. Ozu ndiye alikuwa aingie kwa mbele. Kofi kwa nyuma na Willy kwa pembeni. Wote walipokuwa wameshika nafasi zao walingojea Kofi aanze mashambulizi kama walivyokuwa wamepanga.

Kofi aliruka ua wa seng'enge na kutumbukia ndani ya gereji na pale pale akaanza kusambaza risasi. Wale walinzi waliokuwa pale wengine walianza kusinzia. Mara waliposikia mlio wa bunduki walishika bunduki zao na kuanza kukimbia bila mpango. Willy aliruka seng'enge kwa upande wa pembeni na kuanza kushambulia vile vile. Ozu naye aliruka upande wa mbele na kuanza kushambulia vile vile. Walinzi wa hapa waliingiwa na kiwewe maana walisikia mashambulizi yanatoka kila sehemu. Hii iliwafanya waende ovyo na hivi ikawa rahisi kwa Willy na wenzake kuwashambulia. Ozu aliangalia stesheni ya petroli ilipokuwa na akahisi sehemu gani tanki lingeweza kuwa. Huku akiwa anashambulia alienda sehemu ile na kuanza kutafuta. Willy na Kofi walikuwa wanashambulia vizuri sana na walikuwa wameua walinzi wengi. Walinzi waliobaki waliendelea kujihami kwa kupiga risasi mfululizo bila kukoma, ili kuzuia mashambulizi yaliyokuwa yanakuja. Kwa ajili ya kiwewe hawakujua kuwa kwa kufanya hivi wangeweza kumaliza risasi, mkasa ambao walijikuta wamo baada ya muda mfupi. Hivi walianza kukimbia ovyo.

Ozu aliona mdomo wa tanki akapiga risasi hewani. Kisha akaanza kulishambulia kufuli, na baada ya kulisambaza kwa risasi akafungua mdomo wa tanki. Willy na Kofi walisikia ishara hii waliruka na kutoka nje ya ua. Wakati Willy anaruka alimuona mlinzi mmoja naye anaruka ua karibu na yeye, Willy alimfuata na kumkamata. Mara Kofi naye alifika wakamvuta yule mtu na kukimbia naye. Tanki la petroli lilikuwa karibu na seng'enge, hivi Ozu alitafuta tambara akalipata, akalichovya ndani ya petroli, na halafu karuka ua wa seng'enge. Alipofika nje ya seng'enge aliwasha lile tambara moto, akalitupa kwenye mdomo wa tanki lilipokuwa limefunikwa na akaanza kukimbia kule walikoacha gari.

"Tayari", aliwaeleza wenzake ambao walikuwa na mateka wao. Aliingia ndani ya gari wakaondoka. Kazi hii ilikuwa imefanywa kwa dakika nne. "Je huyu mnampeleka wapi?", Ozu aliuliza.

"Atatusaidia kazi moja sasa hivi," Willy alijibu.

"Mbele kidogo kwenye barabara ya Kasavubu baada ya kona ya Kasavubu na barabara ya Bangala kama unaelekea mjini walikuta kibanda cha simu. Willy alisimamisha gari na kumuamuru yule mtu ateremke. Willy, Ozu na yule mtu waliteremka na kumuacha Kofi akiwa ameliwasha gari tayari tayari kwa kuondoka wakati wowote. Walipofika kwenye kibanda cha simu Willy alimweleza mtu huyu, "Kama unataka kuishi nipe nambari za simu ya gereji Papadimitriou. Nikipiga nikiwapata, nitakupa simu uzungumze nao. Waeleze maneno haya. Gereji Baninga imeshambuliwa lakini hawa watu walioshambulia tumepambana nao wakakimbilia hapa shuleni, sasa tumewazingira tunarushiana risasi tunaomba msaada, umeelewa?" Willy alimuuliza.

"Ndiyo", yule mtu alijibu kwa woga. Mtu yule alitoa nambari za simu ya Papadimitriou bila kusita. Willy alipiga na ikapokelewa mara moja akampa yule mtu. Yule mtu alizungumza nao, na baada ya kujitambulisha aliwaeleza maneno aliyokuwa ameelezwa kusema na Willy, na baada ya kuzungumza tu Willy akakata simu. Halafu akamkata huyu mtu mkono na shingo akaanguka chini akiwa amezirai.

"Twenze zetu sasa gereji Papadimitriou," aliwaeleza wenzake huku wakiingia ndani ya gari.

"Ahaa, nimekuelewa sasa kwanini umefanya hivyo. plani nzuri sana," alisema Ozu. Mara wakasikia mlipuko mkubwa mno uliotetemesha sehemu yote hii ya Kintambo.

Jean, Muteba na Papa walikuwa wanaingia ofisini kwa Papa, ili wafanye mipango ya kuwazuia watu hawa, wakati Lemba mmoja wa wasaidizi wao wakubwa aliyekuwa amebaki baada ya Kabeya, Charles na Masambba, alipowajia. "Tumepata simu kutoka Baninga kwa Mavungu. Anasema Baninga nayo imeshambuliwa lakini wameweza kupambana na watu hawa, na hivi sasa wamewazingira pale shuleni wanaomba msaada kwani mapigano makali yanaendelea".

"Kazi nzuri, twende huko sisi wenyewe, Lemba acha watu wanne tu hapa wengine wote twende mchana hapo sasa ndio mahali pa kufa na kupona", Papa aliamrisha. Wote wakiwa wamebeba silaha zao tayari, waliingia ndani ya magari matatu na kuelekea Kintambo. Bila kujua wakapishana na gari la akina Willy ambalo lilikuwa linaelekea gereji Papadimitriou. Plani ya Willy ilikuwa imefanya kazi.

Itaendelea.....